موسوعة ثورة الأجناس الأدبية
 
الرئيسيةاليوميةس .و .جبحـثالأعضاءالمجموعاتالتسجيلدخول

شاطر | 
 

 أشعار زينب عبدالوهاب

اذهب الى الأسفل 
كاتب الموضوعرسالة
خالد محمد المناوي
مشرف
avatar

المساهمات : 23
تاريخ التسجيل : 25/12/2011

مُساهمةموضوع: أشعار زينب عبدالوهاب   الأحد سبتمبر 30, 2012 5:51 pm


هذه أشعار زينب عبدالوهاب



(1)

عاشق ... بلا أوتار








بدون تكليف
عشقت الليل
و كان تمنه
جنيه مصري و متحرر
أكلت رغيف
وبعد الإذن ما تردش
متقفلش الألم ..
بشويش


عشان تسبح مع التيار
و تفرح ليلة ويا نهار
عليك رسمه .. تدفعها
و سكتة قلب تسمعها
ساعتها تبقى ملعوبة
و تصبح ذكرى مطلوبة

عشان تفهم ..
قصيدة أم متحبش
أنا القلب إللي ميطبش

أنا بحرك ..
ولك قارب .. ملوش تجديف
و متردش ..
لأن الرد ميسرش
بشوفك أربعة و ألفين
و طيارة ألم مكتوبة
و منكوبة ..
في شرم الشيخ
كأن الواحد الأسمر
بقى بوشين ..
و يتوارب كأنه .. الشيش
و يندهلي ..
و يرفعني مع الأسعار
ما انا الواعد .. أنا الطيار

بحريه ..
تقول للنسر أنا دارك
و مقدارك ..
في أذكارك .. و أشعارك ..
و يكفي "مزايا" دعيالك
دموعك ملحمة أسرار
بدقة زار ..
ألم و هزار ...
أنا العاشق .. بلا أوتار
مافيش تخويف
و بعد الإذن متردش
بدون تكليف



(2)

قربيلي ..



قربيلي و اسمعيني
صدقيني اني بحبك
انسى كل الناس خديني
خلي قلبي جوه قلبك

كنت بحلم يوم تجيني

****


الحنان لمسة ف عنيكي
الأمان همسة بأديكي
حتى نجم الليل يا روحي
كلمة حلوة و شوق إليكي


كنت بحلم يوم يجيني

****

قربيلي ... قربيلي
قربي الحب ان بعدنا
الحياة لما بتجيلي
صورة تانية مش بإيدنا


كنت بحلم يوم تجيني


****

هاتي ياللا الفرح هاتي
دانت أجمل ما ف حياتي
افتحي قلبك و كوني
انت كوني و ذكرياتي


كنت بحلم يوم تجيني


****

قربيلي و اسمعيني
صدقيني اني بحبك

انسى كل الناس خديني
خلي قلبي جوه قلبك


كنت بحلم يوم تجيني


****

(3)

دويتو





( أعلنت الحرب على ليلى
أعلنت الثورة و العصيان
و النجم المرأة ف زمنى
يأبى الخسران
النجم الآن يتاجر بالأحزان
لم أذكر شيئاً من حولى
إلا النسيان ..)


و بحبك و بدارى
انا عارفه مقدارى
فينه قلبك ويا قلبى
اه يا حبك .. اه يا نارى


******

هيه رسمة و يا بسمه
تلقى نسمة فـ صوت أتارى
تلقى وردة وشمس فاردة
ألف ياردة بشو قرارى
اه يا حبك .. اه يا نارى



******
بس ابدأ مرة واحده
تلقى كل الدنيا هلّه
بس ابدأ م النهاردة
مسرحية قيس وليلى
آدي قلبك قبل قلبي
قال دويتو مش تخبي
رحت جارية ولا دارية
ألف ياردة بشوق قراري


اه يا حبك .. اه يا نارى



******

(4)

لأني





كلام ... كلام

دا لَمَّا هُنَّا علينا هانوا
فين لما كنا فين لما كانوا

يا قلبي لأه مش مستحقة
حبك يا قلبي زي الحمام


******


قلمي و حروفي قالوم ظروفي
قتلت خوفي ياللا السلام

يا قلبي لأه مش مستحقة
حبك يا قلبي زي الحمام


******



حاسس كأني عايز أغني
وأعشق لأني دايب غرام

يا قلبي لأه مش مستحقة
حبك يا قلبي زي الحمام

(5)

عديني

إلى روح المناضل "شريف جامع"




يا مراكبي وياك عديني على بلدي فلسطين و ديني
دا حبيبي في الغربة مسافر خد ايدي و هناك رسيني

**
قلبي المتشوق هايروحله
عن حزنه و فراقه يقوله
و يخرج ألمه في أحضانه
يتهدى في نسيمه و ضله
منديله في الغربة يداوي
دمعة عيني ف ليلى يا عيني

يا مراكبي وياك عديني
**
هاكتب عنوانه ف نني
وهاخليكي ياغربة تحني
و اديله من عمري يساوي
زي جراحي ف بعده و أني
منديله في الغربة يداوي
دمعة عيني ف ليلى يا عيني

يا مراكبي وياك عديني

**


خد عمري و اديني حبيبي
الأسوه من بعده نصيبي
ليه تسكن في القلب جراحي
ليه يبعد عن جرحي حبيبي
منديله في الغربة يداوي
دمعة عيني ف ليلى يا عيني

يا مراكبي وياك عديني


**
(6)

كونكان ...






كنت بشوف الدنيا أمان
بحر محبة وبر حنان
لما كبرت شوية شوية
لقيت الدنيا مش كون كان


كان كان .. مش كونكان
بقى دي الدنيا ياخلق ياهوه عقلي زرعته لقيته جنان



****

أخ بيقطف ورد أخوه ابن وْعايز يورث ابوه
حتى الأم ياعيني عليها عايزة الدنيا تكون في إيديها
ولا الصاحب حبه لصاحبه لازم فايدة بيجري عليها
بنت وْحلوة عاجبها جمالها عايزة الدنيا وتلعب فيها

كان كان .. مش كونكان
بقى دي الدنيا ياخلق ياهوه عقلي زرعته لقيته جنان




****




واحد ماشي ف عز الضلمة شاف الحرف الساكن ضمة
قال عربية مش عبرية كلمته خافت قالت يا امة
رمى تعريفة قال يا اخواتي آدي ولادي وياّ بناتي
طلع المارد صحّ النوم تاهت أمي وياّ مراتي
شوف بغداد راعي الزمة وفلسطين قول مش هامة
مجلس حاكم زيّ اللمة والتلطيش ماسك الأمة

كان كان .. مش كونكان
بقى دي الدنيا ياخلق ياهوه عقلي زرعته لقيته جنان



****



ألفٌ باء .. يعني شارون لغة يفهمها من صهيون
قلب الدنيا وْبوش بوش خلى الواو قبل النون
قال ويقولوا سلاح ودمار واتفاقية ليل ونهار
لما اللوبي بناله جدار حتى الجامعة هزار في هزار
زي الماشي ف عز الضلمة شاف الحرف الساكن ضمة
قال عربية مش عبرية كلمته خافت قالت يا امة

كان كان .. مش كونكان
بقى دي الدنيا ياخلق ياهوه عقلي زرعته لقيته جنان




****

فكر جديد قلنا حقيقة زمن الحيرة بقاله دقيقة
وحوار وطني بيحيي شباب مرأة محافظة ومرّة جريئة
بس فْ عين الشمس جنون لولبي الع في المليون
يلغي مخالفة بتيجي التانية أصل الوعد بيخلف هون
هو صحيح حبينا سؤال زيّ الريح لبينا جمال
بس المجلس يدعي خرابة مش معقول ولاحتى حلال


كان كان .. مش كونكان
بقى دي الدنيا ياخلق ياهوه عقلي زرعته لقيته جنان


****

شاب وْمبدع فكر فكرة (خلّى امبارح ينده بكره)
ضربوا حزام من تحت حزام طفوا الشمع القايد ذكرى
مش بنخاف .. مش بنخاف ضربوا المبدع لاجل عفاف
رجع الطالب والمطلوب عواجيز وطني شدوا لحاف

كان كان .. مش كونكان

بقى دي الدنيا ياخلق ياهوه عقلي زرعته لقيته جنان




****


(7)
دعوة


بحبك يارسول الله
بحب اليتم من أجلك
سألت الحب فين ألقاه
سمعت القلب يندهلك
وشفت يتيم دعاني بـْ آه
لحفلة وْقال على مهلك
ورحت ْوجيت صحيح لبيت
وقلت "الحزب" من أهلك
كفاك إنك .. أنا منك
بآي الذكر مشفوع لك
بحبك يارسول الله
بحب اليتم من أجلك
سألت الحب فين ألقاه
سمعت القلب يندهلك




(Cool

قضية خارج المحاكمة

إلى مؤسس مدرسة "النسر الأدبية" ، وأُلقيت في الأسبوع الثقافي الذي عُقد بالقاهرة في الفترة من 25/6 حتى 2/7/2001






جاعد بينا وكلنا عارفينه ْ
عايش وبْدينه ْ
كانوا يقولوله فى زمن الصقر
غير اسمك.. وبلاش تفضل ابن الفقر
زاد النقر... و الحرامية نزلوم طقر
قال لازم أفضل حى
نادى الحى بْكـن فيكون.. جاله الحى
راسل لوا من بطن القبر







رد الغايب.. قال أنا جايب.. قولوم هات
هات هات.. فى مخالفات وشويات
باع التين... شال الردم
علشان يبنى بْطوب الهدم
نادى بلجنة للموهوب... فى التشكيل الجاى يدوب
رسم الصورة بالمقلوب..حل الرمز بكشف جديد
هوه الشاعر و القصاص..
زى الحبر تمام فى رصاص
لم جوايز ملو الإيد..
جامعة و مجلس وبنادى قصيد
أصله بقلمه.. سكن ألمه فْ أردب حديد
وادى حكايته فى قلب الوادى




ادى حكايته فى قلب الوادى
كلمة أمانة.. و الموهبة ملزمه فى رساله
حب وصنعه وزرع أيادى
.....

قال له سويلم أرقب سنك
خليك جوه و هات عناقيد
تلقى القوة فى الزغاريد.. عال العال
وأسألوا صاحبه.. الشرقاوى و عبد العال
ولا لبيب و خفاجه كمان
والهوارى معاه سرحان
حتى البوهي والسرساوي .. ،
وطعم اللوحة جنان في جنان
.....



يبعت فوزى خليل منشور
كيف المصرى يبقى عريس... فوق العالم مش محشور
زى الموج الساخن لما يْبقلل
ينده كل عرايس البحر.. أصله دا بحر
لسه حكايته.. زى النيل و الهرم الرابع





قال مش طابع برد و ْ رعد
سن الريشة و كان الحد
وطنى معاند و يا الريح.. تلقاه سد
واقف فوق مسطرة النقد
بعيون عارية وقلب جريح
يرمى الكلمة بمليون معنى.. مْعاه تصريح
خلى امبارح ينده بكره بْتوب العيد
و التفصيل م الترزى صلاح جوه الأوضه
حتى الموضه موديل بعيد... كيف الرد
فى الحفلات و الإعلام جزر ومد



قول يا غرابلى..قول للعالم..كيف العالم مليان أسر
بلدياتك أهله فتوه..وأنت الشاهد له ع الكسر
فاكر لما خدوه ع الجسر ؟

لمح الضحكة هناك ع الشط..
راح واتمط.. شد الخط
قال راح أيوب..جه أيوب..
أنا عايش راضى بالمكتوب
مش مغلوب...لساى قادر ع التأسيس
و البرهان فْ قلبى ونيس...جاله سرور
مد جناح بعيونه لفوق...لازمه تروق
كات جمعية دار النسر...
زاد النقر.. و الحرامية نزلوم طقر
أخدو الاسم كما السنسير....عدوا الفقر
حتى قرايبه فْ جوه الدار...قادوا النار
شافوا الحق فْ دق الزار


قال بعدين .. !!

يبقى القدس راحوله بزرار
وعميل السكة شهيد فى قطار
قاله الشيخ درويش بهزار
أنت يا ولدى النسر نزار









(9)

ياريتك



نفسي ياحبي .. انا كنت تشاور
قبل ياحبي ما كنت تهاجر
تمسك إيدي وتحضن عيني
جوه ف قلبي كله مشاعر

***





قرب مني .. حس بألمي
امسح دمعي .. حن لحزني
ابعت ليه ف مره جواب
ولا تقول ده كلام في كتاب


***


بعاد .. بعاد
ألم وسهاد
ودمعة حزني ..
لونها مداد
نفسي ياحبي .. انا كنت تشاور



***


(10)

نلنا المرام


طار الحمام .. حط الحمام
قال ياسلام .. محلى الكلام

طار الحمام م البنية حط الحمام جوه ايديه
لمست ريشه بحنية هدل وقاللي ياعنيه
في كل يوم الصبحية أشوف عنيكي العسليه
وقلبي يرقص م الفرحة واعيش ليومي وليليا

طار الحمام .. حط الحمام
قال ياسلام .. محلى الكلام


الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
 
أشعار زينب عبدالوهاب
الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
نبضات الشاعر محمد الشحات محمد :: قسم الشعر :: الشعر العامى (الشعبى)-
انتقل الى: